У красавіку 2023 года ў Беларусі ладзіцца рэспубліканская добраахвотная акцыя «Тыдзень лесу», прысвечаная Году міра і стварэння. Традыцыйна арганізатарам мерапрыемства выступае Міністэрства лясной гаспадаркі Рэспублікі Беларусь.

Галоўнай мэтай акцыі з'яўляецца захаванне і прымнажэнне лясоў, прыцягненне ўвагі грамадскасці да вырашэння агульнадзяржаўных задач у сферы ўзмацнення экалагічнай, эканамічнай і сацыяльнай ролі лясоў.

У гэтым годзе Тыдзень лесу ладзіцца ўжо ў шаснаццаты раз. За ўвесь час акцыя палюбілася беларусам, многія сталі яе пастаяннымі ўдзельнікамі. Актыўны ўдзел у мерапрыемстве прымаюць не толькі сем'і, але і працоўныя калектывы, грамадскія арганізацыі, прадстаўнікі органаў дзяржаўнага кіравання.

Падчас акцыі ўдзельнікі змогуць стварыць новыя лясы і прывесці ў парадак месцы пахавання воінаў, якія загінулі ў гады Вялікай Айчыннай вайны, мемарыяльныя комплексы.

Акрамя пасадкі лесу добраахвотнікі паўдзельнічаюць ва ўборцы смецця і захламленасці, добраўпарадкаванні месцаў масавага адпачынку.

Стаць удзельнікам акцыі можа кожны. Для гэтага дастаткова звярнуцца ў бліжэйшы лясгас або лясніцтва і заявіць пра сваё жаданне. Лесагаспадарчыя ўстановы забяспечаць валанцёраў неабходным інвентаром і пасадачным матэрыялам, а таксама пакажуць аб'екты, якія маюць патрэбу ў пасадцы лесу.